Prishtina sërish mposht Llapin, Drita më një këmbë në finale

Prishtina sërish e ka mposhtur Llapin. Prishtinasit sot munden Llapin, me rezultat 2-1, në ndeshjen e parë të gjysmëfinales së Kupës së Kosovës.

Kryeqytetasit të cilët edhe në fundjavën e kaluar, triumfuan në duel me llapjanët, edhe sot arritën një fitore tejet të rëndësishme në garën për të prekur finalen e madhe të Kupës së Kosovës.

Gledi Mici (36’) dhe Endrit Krasniqi (84’), shënuan nga një gol për fitoren e Prishtinës, derisa golin e vetëm për skuadrën e Tahir Batatinës e realizoi Arbnor Ramadani (62’) nga penalltia.

Drita kryen punën

Ndërkohë, fitore të madhe ka arritur edhe Drita e cila mundi Ramiz Sadikun, me rezultat 3-0, duke bërë hapin e madh në rrugën për finalen e kësaj garë prestigjioze në vendin tonë.

Albin Krasniqi, Hamdi Namani dhe Muharrem Jashari shënuan për fitoren e gjilanasve.

Ndeshjet e kthimit luhen pas një javë. /F.BYTYQI/